СЕДМЕ ЗАШЕДАНЄ ПРЕДСИДАТЕЛЬСТВА СФУЛО

ПРЕДСИДАТЕЛЬСТВО СФУЛО У СЕРБИЇ

- заказане за 13. и 14. юний у Руским Керестуре

Согласно догварки субєктох Федерациї, предсидатель орґанизациї, котра зазберує українских Лемкох/Русинох, Володимир Ропецки, заказал схадзку Предсидательства у Руским Керестуре. На зашеданю ше обчекую госци зоз партнерских организацийох з котрима сотрудзує Союз Русинох Українцох Сербиї, а котри члени СФУЛО. То Обєднанє Лемкох зоз Польскей, Союз Русинох-Українцох Словацкей, Союз Русинох и Українцох Горватскей , Товариство „Лемкивщина“ з України, а як госц поволана Українска матица з БиХ.

Дня 13. юнияа госци нащивя службу Божу у катедралней церкви у Руским Керестуре, после котрей положа квеце на гроб владики др Дионизия Нярадия. После того, на 11.30 годзин будзе отримана наукова конференция пошвецена 70-рочнїци преглашеня Карпатскей України. О улоги владики др Дионизия Нярадия, як духовного вожда Карпатскей України, викладанє отрима о. Михайло Малацко. Др Янко Сабадош и новинар Велимир Паплацко упознаю присутних о подїйох у Хусту 1939. року и приходу вибеженцох и влади Карпатскей України до еґзилу, до тедишнєй Кральовини Югославиї и їх пребуваню у наших местох у Бачкей и Сриме. Свойо присуство и виклади наявели и Олекса Павлешин з Хорватскей, др Микола Мушинка зоз Словацкей, професор М. Сополига зоз Словацкей, професор Павле Чучка - младши зоз Ужгороду (Україна ) итд. На самим Предсидательстве, котре будзе отримане на 15.30 годзин розпатри ше робота Федерациї за остатнї рок, виполнєнє планох у 2009. року, обставини коло друкованя новей „Историї Лемкивщини“, будзе ше презентовац карта Лемковщини итд. Источашнє ше утвердза и податки коло медзисобних нащивох фестивалом и другим манифестацийом котри организую субєкти. Истого дна вечар, шпивачка София Федина з України, виступи з русинскима/лемковскима писнями, вєдно з аматерами КУД „Карпати“ Вербас.

Госци буду присуствовац рочней скупштини Союзу Русинох Українцох Сербиї котра будзе отримана у Вербаше дня 14. юния 2009. року з початком на 11.00 годзин у просторийох КУД „Карпати“. После скупштини госци обиду дзепоєдни обисца наших людзох, а после того будзе организоване друженє у єдним од ресторанох у Руским Керестуре.

Б. Виславски

ПРОГРАМА СЕДМОГО ЗАШЕДАНЯ ПРЕДСИДАТЕЛЬСТВА СФУЛО У РУСКИМ КЕРЕСТУРЕ ОД 12-15. ЮНИЙ 2009. РОКУ

Пияток, 12.06.2009.

18:00-20:00 годзин – Приход делеґацийох до Руского Керестура

Собота, 13.06.2009.

10:00-11:15 годзин– Служба Божа у катедралней церкви у Руским Керестуре
11:20-11:30 годзин – Покладанє квеца на гроб владики Дионизия Нярадия
11:30-14:30 годзин – Наукова конференция пошвецена 70-рочнїци преглашеня Карпатскей України под о. Авґустином Волошином (керестурска парохия)
• Викладанє о. Михайла Малацка на тему “Живот владики Дионизия Нярадия и його учасц у подїйох 1939. року у Хусту”
• Викладанє др Янка Сабадоша на тему “Карпатска Україна”
• Филм о Карпатскей України
14:30-15:30 годзин – полудзенок у интернату Руским Керестуре
15:30-18:00 годзин – Зашеданє Предсидательства СФУЛО (интернат)
20:00 годзина – Концерт КУД “Карпати” у Вербаше
21:30 годзин – Вечера у КУД “Карпати” у Вербаше

Нєдзеля, 14.06.2009.

11:00 годзин – Рочна Скупштина Союзу Руснацох Українцох Сербиї у Вербаше (КУД “Карпати”)
13:00 годзин – Конференция за новинарох (Вербас)
14:00-15:00 годзин – Нєофицийне стретнуце зоз членами Союзу Руснацох Українцох Сербиї у КУД “Карпати” у Вербаше
15:30-16:30 годзин – нащива фамелийом Кренїцкових и Гаргайових у Руским Керестуре
17:00 – Полудзенок у ресторану “Лонґов” у Руским Керестуре

Пондзелок, 15.06.2009.

10:00 годзин – Одход делеґацийох

ПЕРШИРАЗ ЗАШЕДАНЄ ПРЕДСИДАТЕЛЬСТВА СФУЛО У СЕРБИЇ У РУСКИМ КЕРЕСТУРЕ

Всоботу пополадню 13-го юния у будинку интернату керестурскей Основней школи и Гимназиї „Петро Кузмяк”, отримане VII зашеданє Предсидаельства Шветовей Федерациї українско,русинских лемковских организацийох (СФУЛО), котрому предсидовал доцент Львовского Универзитету, скулптор Володимир Ропецки, предсидатель СФУЛО, а у чиєй роботи учествовали Союз Русинох-Українцох Словацкей хтори представляли: Петро Сокол, др. Мирослав Сополига, Иван Лаба и Мирослав Илюк. Союз Русинох Українцох Горватскей представяли: мр. Теодор Фрицки, Славко Бурда, Мирко Федак, Олекса Павлишин и Гавриїл Такач. Товариство „Лемковщина” зоз Львова зоз України представяли: Володимир Ропецки, Игор Дуда, София Федина и Лидия Плахтий. Обєднанє Лемкох зоз Польскей представял Василь Шлянта, предсидатель т ого здруженя.Лемкох зоз ЗАД представял Володимир Максимович а Союз Руснацох Українцох Сербиї Богдан Виславски, Яким Грубеня и Велимир Паплацко. Цали час схадзку Предсидательства провадзел и участвовал у єй роботи перши секретар Амбасади України у Сербиї Олександар Кириченко.

Зашеданє СФУЛО

Попри черанки искуствох и упознаваня зоз активносцами медзи двома зашеданями доминовала тема о роботи тей организациї у прешлим року як и плани роботи и сотруднїцтва за 2009. рок. На зашеданю презентована и мапа Лемковини, на хторей територия розсельованя Лемкох у гранїцох сучасней Польскей штредком XX вику як и розсельованє за границями Польскей ( до України) з оглядом же ше у остатнїм чаше и зоз наукового аспекту почина вше озбильнєше обрабяц єй историю( Лемковщини) за цо задлужени др. Мирослав Сополига, директор Українского Музею у Свиднїку у Словацкей. У наступним периодзе ше планує видац Историю Лемковини.

На сходзе визначене же треба активовац младеж о чим бешедовали Лидия Плахтий и политиколог и шпивачка лемковских писньох София Федина и през заєдницки екскурзиї до жемох членох Федерациї, упознац их зоз културу и обичаями людзох хтори у нїх жию. На концу VII зашеданя Предсидательства СФУЛО догварене же би ше направела окремна Резулуция хтору зробели др.Янко Сабадош и Володимир Ропецки а котра ше одноши на положенє Українцох, Руснацох и Лемкох у жемох котрих жию и була послана Предсидательови України Викторови Ющенкови. Ютре дзень Резулуцию на Рочней Скупштини Союзу у Вербаше презентовал др. Янко Сабадош.

На зашеданю СФУЛО подогваряне же на хторих фестивалох, у Снїни, Ждинї, Монастириску буду наступац културно – уметнїцки друштва зоз Сербиї, як и хто будзе госц на фестивалу Духовней писнї у Снїни як и на фестивалє Маковицка струна у Бардейове. Зоз Павлом Чучком младшим догварене сотруднїцтво як и участвованє на фотбалским турнире у Баранїнцох при Ужхородзе на котрим наступи єдна пионирска футбалска репрезентация зоз наших местох под меном „Русин”.

Тиж так було слово о тим хтори манифестациї як и стретнуца и науково конференциї нащиви делегация Союзу Руснацох Українцох Сербиї.

Госци истого дня вечар нащивели КПД Карпати у Вербаше дзе отримани рочни концерт друштва на хторим барз успишно виступела и госцинска зоз Львова София Федина.

В.Паплацко