Медзинародне сотруднїцтво

Семинар за младих


Oзначена двацец-рочнїца Дружтва "Лемкивщина"

36. фестивал „Маковицка Струна”

Др Микола Новта

МЕДЗИНАРОДНА НАУКОВА КОНФЕРЕНЦИЯ - ЧЕРНЇГОВ 2009.

(Україна - Дияспора)


У Чернїгове од 15. до 17. юния того року отримана 5. Медзинародна наукова конференция, "Українство у швеце: Україна там дзе жию Українци".
Чернїгов ше находзи 160 км сиверно од Києва. У нїм жиє вецей як 300.000 жительох.

Конференцию орґанизовал чернїговски Державни педаґоґийни универзитет "Тарас Шевченко", Фондация добродїйних дружтвених орґанизацийох " Україна - дияспора", Канадска амбасада у України и Фонд професора Ореста Цапа зоз Канади.

Конференция робела у 5 секцийох. Почала зоз пленарним зашеданьом, у рамикох котрого пречитани 12 реферати. Реферати поднєсли представителє шлидуюцих державох: України, Канади, Мадярскей, Нємецкей, Билорусиї, Русиї и Татарстану и Зєдинєних Державох Америки.

На пленарней схадзки свой реферат "Проблеми охрани националней идентичносци у дияспори на прикладу Руснацох и Українцох у Войводини и Горватскей" поднєсол М. Жирош, публициста зоз Мадярскей. На концу пречитани реферат на английским язику, "What is hidden in Sallcburg catacombs"(Цо ше скрива у салцбуржшких катакомбох, Славомира Олеяра зоз Торонта ( Канада), котри пречитала Олена Колесникова).
На першей секциї под назву "Українска дияспора: история, сучасносц, проблеми, напрямки сотруднїцтва медзи дияспору и Україну". Поднєшени 51 реферат зоз України и швета.

У другей секциї розпатрани досцигнуца, виглєдованя, проєкти младих науковцох. Ту поднєшени 37 реферати.

На трецей секциї розпатрани мистецтво, филозофия, фолклор у України и дияспори, и Церква у України и дияспори. Тота секция тиж була богата зоз змистом, на нєй пречитани 40 реферати.

У музейних просторийох визначного українского писателя Михайла Коцюбинского ше отримовала штварта секция о язику, литератури у України и дияспори. Ту поднєшени 32 реферати зоз обласци линґвистики и литератури. На тей секциї свой реферат поднєсол и др Микола Новта зос Нового Саду. Вон представел троязични словнїк медицинскей терминолоґиї, котри зложели руски лїкаре рижних специялносцох у сотруднїцстве зоз рускима линґвистами, а у виданю Дружтва за руски язик, литературу и културу. Саме викладанє прицагло вельку увагу присутних линґвистох бо є пречитани на нашим литературним язику. Було то за нїх приємне нєсподзиванє, розвила ше дискусия, та було вельо питаня о нас и нашим язику.

На пиятей секциї розпатрани питаня школства у України и дияспори. Ту було 20 реферати. Свой реферат под назву "Културно националне препородзенє Руснацох у XІX вику у Войводини", поднєсол др Янко Рамач, котри нє бул пречитани пре його одсутносц ( у тим чаше бул на Науковей конференциї у Познаню у Польскей).

На тей науковей конференциї поднєшени вецей як 120 науково реферати. Бешедни язики конференциї були українски, росийски, билоруски и английски.
На вимогу орґанизатора, нашо реферати були пречитани на руским литературним язику.

Шицки реферати нєодлуга буду друковани у окремним науковим зборнїку.

У рамикох конференциї була орґанизована екскурзия по историйних часцох городу, як и кратки вилєт на ладї по рики Десна.


Боґдан Виславски

ОЗНАЧЕНА ДВАЦЕЦРОЧНЇЦА ДРУЖТВА "ЛЕМКИВЩИНА"

У Львове,у України, од 12. до 14. януара того року отримана святочносц з нагоди снованя тей организациї Лемкох/Русинох . Програма почала пондзелок, кед у просторийох Политехнїчного институту у Львове означени Крачунски швета под назву «Лемковска вилїя». На истей програми ше позберало вельке число Лемкох/Русинох з України, од Закарпатскей обласци прейґа Львова и Києва, па до Луганска. Шицки пришли зоз торбами у котрих принєсли єдзене и пице, же би ше вєдно погосцели и означели тото швето. На програми виведзени и вецей Вертепи, а госцох забавяла и позната шпивачка лемковских/русинских писньох София Федина.

Другого дня отримана наукова конференция под назву « Товариство Лемкивщина у орбити українского дружтва». Манифестация отримана у прекрасним амбиєнту «Палати Пилсудских», а уводне слово дал предсидатель тей организациї Олександр Венгринович. На конференциї виступели велї науково роботнїки, як Иван Щерба, Иван Красовски, Галина Щерба, Степан Панейко, Орест Чабан, Марта Капрал, Степан Кишчак, Ярослав Бодак, София Федина, предсидатель СФУЛО и познати скулптор Володимир Ропецки итд. Медзи иншима, виступел и нам добре познати академик з Пряшова Микола Мушинка. Вон порихтал виклад на тему «Култура русинох-українцох Словацкей у контексту Европского союзу и перспективи єй розвитку». Окрем того, вон презентовал свойо кнїжки «Дописоване Ивана Зилинского з Иваном Панькевичем» и « Лїкователь тїла и души».

Истого дня отримана и схадзка предсидательства СФУЛО. Як и на цалей манифестациї, окрем домашнїх, ту були представителє Союзу Русинох-Українцох Словацкей, Обєднаня Лемкох зоз Польскей и Союзу Русинох Українцох Сербиї. Догваряло ше коло дальших активносцох, а идуца схадзка предсидательства ма буц отримана у мешацу юниюу того року у Сербиї, преширена и зоз другима манифестациями.

Остатнього дня, дополадня, отримана служба Божа у Лемковскей церкви у Львове, а пополадню отримани святочни концерт у будинку львовскей опери. На концерту, котри тирвал вецей як три годзини, приказана дїялносц амтерских групох Лемкох/Русинох, як и дїялносц велїх уметнїкох. На концеру були представителье городскей власци, високи представителє церкви, заменїк министра култури и туризму України Олґа Бенч итд.


 

В. Паплацко

На 36. фестивалу „Маковицка Струна” у Бардейове у Републики Словацкей наступели и Oраховчане


На Миколая по новим календаре 6 и внедзелю 7 децембра 2008 року у Бардейове и Пряшове отримани фестивал „Маковицка Струна”. Бул то 36. фестивал народних шпиванкох на хторим наступели вецей як сто виводзаче.Госци зоз Орахова припутовали до Бардейова пияток пополадню и по змесцованю до Словацко-Польского Дому на Старей площи присуствовали вечаршим шветочносцом з нагоди Миколая дзе вон наймладших даровал зоз пакециками.



Панорама Бардейова – Стара площа зоз Городску хижу
и катедралу св. Едигия

Словацко-Польский Дом на Старей площи
украшени за швета


Шветочносц на площи з нагоди Миколая


Того року по перши раз на Маковицкей струни були и госци зоз Войводини зоз Сербиї. Були то члени Културно –уметницкого друштва „Петро Кузмяк” зоз Нового Орахова зоз шпивачами Борисом Магочом и Саню Полдруги, хтори наишли на барз добри приєм при публики як у Бардейове, так и у Пряшове. У Бардейовскей спортскей гали „Мир” всоботу отримани два концерти, єден за членох жирия у попладньових ходзинох а вечар гала концерт. Внедзелю пополядню гала концкрт повторени у Пряшове у Словацким театре „Йонаш Заборски” дзе була полна сала нащчивительох хтори учасником и госцом щиро аплаудирали, а окреме кед слово о госцох зоз Войводини.

 


43- Концерт у Бардейове


Концерт у Бардейове


Учаснїки концерта у Пряшове зоз водителями

Наступ Санї Полдруги и Бориса Магоча зоз провадзеньом орхестри Културно–уметницкого друштва „Петро Кузмяк” зоз Нового Орахова


Вельки аплаузи окреме на концерту у Пряшове достал и дует бандуристох зоз Львова зоз України. Фестивал отворел Иван Лаба предсидатель Союзу Русинох-Українцох Републики Словацкей. Попри Союзу як организатор фестивала бул и город Бардейов у хторим пияток 5 децембра пребувал и городоначальник Сримских Карловцох Миленко Филипович хтори зоз ородоначальником Бардейова Борисом Ганущаком подписал контракт о сотруднїцтве двох городох.
Хоч по тераз отримани 36 фестивали, по перши раз ше на єдним зоз нїх зявели шпиваче зоз Нового Орахова дзекуюци Союзу Руснацох Українцох Сербиї хтори им оможлївел тото госцованє.


Get free Dreamweaver templates and extensions at JustDreamweaver.com