ДЮРА ПАПУҐА
(1940–2003)
Дня 21. марца 2003. року, у Новим Садзе, у 63. року живота нєсподзивано
умар Дюра Папуґа.
Дюра Папуґа народзени 20. априла 1940. року у Руским Керестуре, дзе
закончел и основну школу. Ґимназию закончел у Вербаше, а Електротехнїчни
факултет у Любляни. Маґистровал у ЗАД, у Нюарку, держава Ню Джерси.
Робел у Цукровнї у Вербаше, “Аґроиндустриї”, на Машинским факултету
и “Аґрокопе” у Новим Садзе, Цукровнї у Жаблю и “Нафтаґазу” у Новим Садзе.
Од 1992. року робел у своєй приватней фирми “Пап-инґ”.
Дюра Папуґа бул щири приятель, добри орґанизатор и чловек котри просто
крачал по животней драги котру себе вибрал, нє вагал ше и нїґда нє скруцовал
з нєй анї налїво, анї направо. Прето мал вельо приятельох медзи шицкима
людзми добрей дзеки и отвореного шерца.
Попри тим же бул добри орґанизатор, Дюра Папуґа уложел и свой власни
пенєж до ушорйованя сали у новосадским РКПД, у котрим як предсидатель
Новосадскей секциї Союзу Руснацох и Українцох Сербиї и Чарней Гори уведол
праксу и обичай сходзеня каждого остатнього вовторку у мешацу же би
ше дожило дацо красне – же би ше чуло хасновити преподаваня, нашу красну
писню, мацеринску бешеду... Дюра Папуґа бул єден зоз тих цо финансовал
и нашо Спортски бависка “Яша Баков”. Як предсидатель Секциї привреднїкох
Союзу зберал наших дїловних людзох и помагал им най преширя свою дїялносц,
най ше повяжу зоз такима у України. Як подпредсидатель Союзу Руснацох
и Українцох Сербиї и Чарней Гори успишнє заменьовал предсидателя.
Дюра Папуґа бул свидоми же у нашей заєднїци треба твориц лоби технїчней
интелиґенциї и дїловних людзох. Себе давал у тим напряме. На початку
у Союзу, а вец тото жадал и у Националним совиту Руснацох. У Националним
совиту го уважовали як єдного з найконструктивнєйших членох. Нєпостредно
пред шмерц Совиту бул вибрани за секретара Совиту. Длугорочне искуство
у привреди, робота з людзми, очигляднє же го научели ствари видзиц таки
яки су, а нє яки би ми любели же би були. Знал преценїц и оценїц, а
знал и винайсц ришенє и то вше на якишик иншаки способ як то други робя.
Праве тоти схопносци го видвойовали и творели му авторитет.
Зоз своїм дїлом Дюра Папуґа будзе записани медзи нашима людзми котри
означели свой час и записали ше з велькима буквами до историї свойого
народу.
Поховани є 24. марца 2003. року на Новим теметове у Новим Садзе.
