Хронїка Союзу за 2009. рок

Александра Дудаш

У РУСКИМ КЕРЕСТУРЕ ОТРИМАНИ СЕМИНАР ЗА МЛАДИХ

У школи “Петро Кузмяк” у Руским Керестуре од 27. по 30. авґуст, отримани дзевяти по шоре, Семинар за младих хтори орґанизує Союз Руснацох Українцох Сербиї.
Младим учашнїком Семинара понукнути даскельо теми зоз историї, култури, литератури и виронауки, о яких нє можу дознац у своїм порядним школованю. Викладаня зоз историї отримали др Янко Рамач, на тему “Свадзебни обичаї при Руснацох”, и проф. Иван Пап о теми “Насельованє Руснацох до Бачкей”. Микола М. Цап, редактор “Шветлосци” младим бешедовал о “90-рочнїци Руского народного просвитного дружтва (РНПД)”, а Микола Шанта, редактор Видавательней дїялносци “Руского слова”, о “100-рочнїци народзеня учителя Михайла Ковача”. О теми нашей вири и обряду, зоз младима бешедовал керестурски капелан о. мр Дарко Рац.

Условия студираня на України учашнїком Семинара презентовали студенти Соня Паплацко и Мирко Преґун, а о роботи руских медийох бешедовала Александра Дудаш, новинарка и координаторка Семинара.
Кажди дзень, млади участвовали и у роботи трох секцийох, драмскей котру водзел писатель, режисер и ґлумец Владимир Кочиш, подобовей хтору провадзел уметнїк Владимир Дороґхази и у музичней зоз студентом музики Мирком Преґуном. Окреме интересантна була и креативна роботня о тканю котру водзели професорка Биляна Романова и дизайнерка Лидия Рамачова у хторей було презентоване тканє як ремесло и у Руским Керестуре и вообще у швеце. Млади учашнїки Семинара попри тим мали нагоди и за друженє и рижни рекреативни змисти.
Семинар ше намага прицагнуц прозберац младих Руснацох и Українцох зоз шицких наших местох. На тот завод учашнїки пришли зоз Нового Саду, Дюрдьова, Коцура, Нового Орахова, Вербасу, Суботици и Руского Керестура. Було их 28 од 13 по 18 роки, понеже пре нєдостаток финансийних средствох того року и число учашнїкох як и число дньох отримованя Семинара були огранїчени.

Семинар финансовал Покраїнски секретарият за образованє, гоч конкуроване за средства до велїх институцийох. Медзитим, без огляду на минимални средства, мож повесц же Семинар бул удатни и же прави успих же є и отримани и же нє претаргнути континуитет з оглядом на економску кризу и почежкосцох при обезпечованю средствох за його отримованє.
Нарок, кед ше означує ювилейна 20-рочнїца од снованя Союзу и 10-рочнїца отримованя Семинару, орґанизаторе ше буду намагац орґанизовац тоти преслави на високим уровню, та так наявени велї новосци у програми Семинара.
Най здогаднєме, Семинар за младих ше под тим меном орґанизує уж дзевец роки, а вон заправо нашлїднїк дакедишнєй Лєтней школи за младих котра почала далєкого 1966. року, дараз тирвала и по двацец днї и зоз по 100 учашнїками. Дзепоєдни дакедишнї єй учашнїки тераз и преподаваче, або нашо визначни културни роботнїки.

Боґдан Виславски

ДЗЕЦИНСКИ МЕДЗИНАРОДНИ ФОДБАЛСКИ ТУРНИР У БАРАНИНЦОХ

Од 28. до 30. августа того року у Баранинцох, котри представяю предмесце Ужгороду, отримани III дзецински медзинародни турнир з малого фодбалу. На турнир поволани екипи з України, Словацкей и Сербиї и то з местох цо ноша мена животиньох. З України наступели фодбалере з Бусовиска, Баранинцох, Воловецу, Ужгороду, Ракова, Медведивцох, Турї Пасики, Коропецу, Голубини, Чайковичох и з Вовкова. Зоз Словацкей виступели фодбалере з Вранова на Топлї, а зоз Сербиї зоз Жабелю. На турнир поволани и тим з Коцура, котри нє мог присц пре Кирбай, та место их виступела екипа под меном «Коцур», составена зоз бавячох з Дюрдова и Пидгорного (Україна ), а котра одбавела два змаганя. Екипа Жабелю була составена зоз шейсцох фодбалистох зоз Дюрдова, двох зоз Жабелю и єдного з Чурогу. Виступели вкупно шеснац екипи.

Фодбалере зоз Жабелю одбавели шейсц змаганя, од котрих маю єдну побиду, два нєришени резултати, а два змаганя страцели. Перше место на турниру завжали фодбалере з места Воловец, друге место з Баранинцох, треце место з Руских Комаривцох, штварте место з Бусовиска, док екипа Жабелю пията. Найлєпши фодбалере з Жабелю були Давид Салак и Милош Максимович.

Турнир организовали Баранинска валалска рада на чолє з Павлом Чучком-младшим и Благодарни фонд « Е. Еган « з Ужгороду, а одход наших фодбалерох организовали Союз Руснацох Українцох Сербиї и Спортски союз општини Жабель. На турниру були присутни предсидатель скупштини општини Жабель Степанов Милорад, члени Општинскей ради Боро Милич и Витомир Лисица, подпредсидатель скупштини општини Жабель Йовица Панич, як и посланїца скупштини Войводини Леона Виславски.

За госцох з Сербиї домашнї организовал обиходзене централней часци Ужгороду, Катедралней церкви, Етнографского музею итд. Окреме, домашня младеж наших фодбалерох одведла до Клубу-ресторану байкерох и организовала им диско вечар. Жабельци домашнїх поволали же би участвовали на фодбалским турниру котри ше отрима на лєто 2010. року u Жабелю.

Боґдан Виславски

ОЗНАЧЕНА ДВАЦЕЦРОЧНЇЦА ДРУЖТВА "ЛЕМКИВЩИНА"

У Львове,у України, од 12. до 14. януара того року отримана святочносц з нагоди снованя тей организациї Лемкох/Русинох . Програма почала пондзелок, кед у просторийох Политехнїчного институту у Львове означени Крачунски швета под назву «Лемковска вилїя». На истей програми ше позберало вельке число Лемкох/Русинох з України, од Закарпатскей обласци прейґа Львова и Києва, па до Луганска. Шицки пришли зоз торбами у котрих принєсли єдзене и пице, же би ше вєдно погосцели и означели тото швето. На програми виведзени и вецей Вертепи, а госцох забавяла и позната шпивачка лемковских/русинских писньох София Федина.

Другого дня отримана наукова конференция под назву « Товариство Лемкивщина у орбити українского дружтва». Манифестация отримана у прекрасним амбиєнту «Палати Пилсудских», а уводне слово дал предсидатель тей организациї Олександр Венгринович. На конференциї виступели велї науково роботнїки, як Иван Щерба, Иван Красовски, Галина Щерба, Степан Панейко, Орест Чабан, Марта Капрал, Степан Кишчак, Ярослав Бодак, София Федина, предсидатель СФУЛО и познати скулптор Володимир Ропецки итд. Медзи иншима, виступел и нам добре познати академик з Пряшова Микола Мушинка. Вон порихтал виклад на тему «Култура русинох-українцох Словацкей у контексту Европского союзу и перспективи єй розвитку». Окрем того, вон презентовал свойо кнїжки «Дописоване Ивана Зилинского з Иваном Панькевичем» и « Лїкователь тїла и души».

Истого дня отримана и схадзка предсидательства СФУЛО. Як и на цалей манифестациї, окрем домашнїх, ту були представителє Союзу Русинох-Українцох Словацкей, Обєднаня Лемкох зоз Польскей и Союзу Русинох Українцох Сербиї. Догваряло ше коло дальших активносцох, а идуца схадзка предсидательства ма буц отримана у мешацу юниюу того року у Сербиї, преширена и зоз другима манифестациями.

Остатнього дня, дополадня, отримана служба Божа у Лемковскей церкви у Львове, а пополадню отримани святочни концерт у будинку львовскей опери. На концерту, котри тирвал вецей як три годзини, приказана дїялносц амтерских групох Лемкох/Русинох, як и дїялносц велїх уметнїкох. На концеру були представителье городскей власци, високи представителє церкви, заменїк министра култури и туризму України Олґа Бенч итд.

Винчованка Министерства вонкашнїх дїлох України Союзу

В. Паплацко

Нови предсидатель Союзу Русинох-Українцох Републики Словацкей Петро Сокол

У Пряшове соботу 24. януара у присустве 67 делегатох и вецей як 40 госцох отримана Пията скупштина Союзу Русинох-Українцох Републики Словацкей, на хторей розпатрена диялносц тей найвекшей културно-дружтвеней организациї Русинох-Українцох у Републики Словацкей.
Источасно тота скупштина була и виберанкова и на нєй вибрани 25 члени Централней ради Союзу и 9 члени предсидательства. За нового предсидателья Централней ради Союзу вибрани инжинєр Петро Сокол зоз Старей Любовнї.
Приоритетни задатки Союзу у наступним периодзе буду очуванє националного индентитету, ришованє проблемох у школстве, организованє централних фестивалох култури у Свиднїку, Камйонки, Бардейове, Медзилаборцох, Снїни, як и регионалних манифестацийох. Тиж так у найскоршим чаше будзе требац розришиц проблематику коло радио емисийох Радио Пряшова, хтори програму емитує програму зоз Кошицох, а єй обсяг у остатнїм чаше значно часово зменшани.( зоз 16 на 10,5 годзини тижньово), як зме дознали у телефонскей розгварки зоз Павлом Богданом нововибраним подпредсидательом Союзу Русинох-Українцох Републики Словацкей.

Петро Сокол нови предсидатель Союзу Русинох-Українцох
Републики Словацкей зоз подпредсидательом
Союзу Русинох Українцох Сербиї Велимиром Паплацко

Петро Сокол зоз членами Союзу Русинох-Українцох Републики Словацкей и подпредсидательом Союзу Русинох Українцох Сербиї Велимиром Паплацко

М. М. Цап

Нащива делеґациї Союзу Русинох-Українцох Словацкей

СТРЕТНУЦЕ НА НАЙВИСШИМ УРОВНЮ

Под час тогорочного 19. Фестивалу новей рускей народней шпиванки „Ружова заградака”, котри отримани у Новим Садзе 29. марца, як госци зоз Словацкей припутовали члени найузшого руководства Союзу Русинох-Українцох Словацкей Републики (СРУС), на чолє з єй предсидательом инж. Петром Соколом.

Делеґация була госц Союзу Руснацох Українцох Сербиї и у нєй були ище троме функционере тей найвекшей културно-дружтвеней орґанизациї Русинох-Українцох Словацкей: доц. др Юрий Шпирко, подпредсидатель СРУС, Павло Боґдан, секретар СРУС и Мирослав Илюк, главни редактор новинох „Нове життя”.

После вибору нового руководства Союзу Русинох-Українцох Словацкей, котри окончени початком того року, була то перша нащива госцох зоз Пряшова нашей жеми. Под час нащиви госци ше першираз урядово стретли з членми и руководством Союзу Руснацох Українцох Сербиї, а то була и нагода вичерац думаня и догвариц ше о дальшим сотруднїцтве котре з каждим роком приноши вше лєпши резултати.